До гола коска
оној кој те глода однатре
до гола коска е ѕверот
од приказните на баба ти
ѕверот кој доаѓа
од ѕверскиот век
па се умилкува
крвца да ти локне
мевце да ти апне
и да му скрцат забите
на соголената коска
оној кој ме глода однатре
до гола коска е ѕверот
кој од решетки пуштен
ми го настрвува векот
па му се умилкувам
да живеам – преживеам
како мојон пес надвор
летнава жега што ја глода
до гола коска