Тркалезни форми

Му ја отсече косата над челото,
му зеде и од веѓите, клепките
и, мижејќи, му го позајми дишењето:
Болко, болештино, грда горештино,
огладни, опадни и онеможи,
побегни ко сланата од сонцето,
ослепи, оглуви и одврзи се
од под јазикот, од под стапалата
и пушти му ја устата да зборува
и пушти му ги нозете да му одат,
врати му ја сенката на телото
и врати ѝ го телото на душата!…