Состојби на духот и телото по триесеттата

Пред триесеттата
мислев дека не верувам во нештата
што ми беа пред очи,
та трапаво ги испуштав
да си одат во неповрат.
Сега мислам дека верувам во Бога,
иако никогаш не сум го видела.
Сакај го ближниот свој,
тогаш кога ти се чини
дека животот ќе му истече
токму низ твоите дланки.
Љуби го со сета своја немоќ
да делуваш против мене,
ми рече тој,
тогаш кога од него барав
да се премисли.
И делувај со вера
само во себе.