од тебе би побарал само две работи:
слушај ме кога ти кажувам
и
не мисли на моето минато
тукушто помислив:
кога се будиш
како се будиш
мислиш ли на мене
додека одиш да мочаш
(меки ти се стапките по подот,
ме дразниш уште неразбуден)
се гледаш ли во огледалото
додека ги миеш забите –
јас да, секогаш, и се обидувам
да си го предвидам денот –
секогаш погодувам, и во најлошите
(би ги менувал за една твоја насмевка
сите тие лоши денови во неделата)
од тебе би побарал само две работи:
да ми кажеш колку сакаш порно
и
дали би била љубоморна
си ја гледаш ли убавината
во огледалото кое е милозливо
за годините кои ти се впишани
си ја гледаш ли светлината
која ти извира од очите
кога помислуваш на мене