колкава би била
празнината над
дворот ако го нема
овој орев
велиш
ова е можеби
последната топла ноќ
годинава и во тишина
која се вовлекува во разговорот
со насетување на скорото
патување и зимата слушаме
како ветрот ги рони
сувите листови зборови
шумно ги стрмоглавува
во кос пад
на подлога
од месечина помешана
со тенки облаци
празнината меѓу фракталните
гранки станува сè
повидлива