„На дивата свиња не ѝ треба испитување на пазарот
за да пронајде тартуфи во шума“
пронајдени – јас свиња ти тартуфа
се држиме за раце небаре едниот е дете
во толпа во непознат град на фиеста
денот завршува бавно – во fade out
дрвото си ја прибра сенката како што излетникот
си ја прибира простирката послана под дрво
полунаведнати проаѓаме под неговите ниски гранки –
небаре излегуваме од хеликоптер
бараме празна клупа во прегратката на кејот
крај канделабрите чии одблесоци во реката
ќе ги угаси сонцето
засвежува но затоа пак не е претопло
ги гледаме старците кои одат некаде
бавно и сигурно – во fade out
би имале ли што да си кажеме за 10 години –
ќе се познаваме предобро и ќе се избегнуваме
прекрасни се овие моменти на презентација
на најдоброто што мислиме дека го имаме
а маните и непремостливите разлики
нека останат притаени – за сега
не сме клинци да се фаќаме на клупа
но прв пат сме на одмор заедно
и се запознаваме запознавајќи го градот –
цел живот ќе се запознаваме запознавајќи
го животот
и кога вистински ќе се запознаеме
еден ќе мора да си оди