1.
После две недели
гледање само МТВ
викнавме мајстор
за сателитска
од Битола.
Само што дојде
снема струја,
не завршивме работа.
Долга е раката
на државната
радиодифузија.
2.
На бандерата
два некролога
за два дена.
Да не ги видевме
божем не ќе знаевме
дека смртта влегла
во селото.
Тоа и онака умира.
3.
Жолтата лежалка
меѓу две стебла
се дуе од ветрот –
личи на стомак
на бремена.
Тоа објаснува
зошто во неа
стануваш ко фетус.
4.
Секое излегување
колата ја полниме
со ќеси ѓубре,
да не го фрламе
во селската река.
Цел пат до Сливница
ни труе
на расипана паштета.
Добрите намери
се поплочани
со јака смрдеа.
5.
На влез на Охрид
карши–карши
две погребни претпријатија –
едното вечен,
другото мирен сон.
Кога ќе размислиш
има квалитативна разлика.
Во близина ресторан „Парламент“,
вечна слава
и вистинска демократија.
6.
На местото на хотел Парк
градат апартмани
со поглед на езеро,
2,500 евра квадрат.
Може за мене
една хипотенуза
за 100 евра?
7.
Селото се вика Рамне,
а до него
километарска угорница.
Сигурно сакале
да ги зафркнат Турците,
овие да тргнат угоре
без висинска подготовка.
Комитите се криеле
зад грмушките
и се кикотеле
кога овие почнувале
да пцујат
керата, анасана.
И после не сме имале
гео–стратешка политика.
8.
Никој веќе не го спомнува
Пецо Шибев
најпознатиот
ѓаватски пијаница.
Кога бев мала дојде на гости
и кога го прашавме
што сака да се напие
облечен во шинел
од Сремски фронт
рече:
„Би сакал
една бела кафа“.
9.
Во центарот на Битола графит:
„Освесте тесе Македонци“
Граматиката е опиум
за народо.
10.
Споменикот во Ресен
во форма на јаболко
галиба за’рѓал,
ко скапано.
Ама па на овошје,
дека органско,
и му личи да е расипано.
А на шмизла?
11.
Кога бил мал
татко ми имал куче,
го викале Барак.
Им било вишок
па го дале во Свињишта.
Да чујат сега Американците
за прогонството на Барак
маф ни е работата.
12.
Некој го украл патоказот
на влезот на селото,
ама затоа во него
на едно вртење десно
има самоделски знак
„Гулабова маала“
Кради глобално,
делувај локално.
13.
Оваа година прв пат
не ме касна комарец.
Не е на арно.
Ако не сум им веќе интересна
на инсектите,
наскоро нема да им бидам
ни на луѓето.
14.
Зуењето на пчелите
се меша со брмчењето
на фрижидерот за длабоко.
Мед и месо.
15.
Живко Топев
што живее на ридот
го завикале
Бум ТВ –
само кај него
фаќала телевизијата.
16.
„Ти виси мрсул од носот,
да не си настинат?“
„Не, за украс ми е“,
вика Иван,
и си го бутка назад.
17.
На кларинетот
на татко ми
„Стрејнџерс ин де најт“
звучи исто како
„Не се бели Маре мори“.
На оној на Вуди Ален
сигурно е обратно.