Ти се чини како да ги разбираш
празните места во историјата
темните периоди кои страдаат
од недостаток
на материјални докази
и сведоштва.
Како да го насетуваш
топлиот бран кој доаѓа
од задграничните
предели на раз–умот
кајшто расудувањето се слева
во едно
со верата.
Заминуваш.
Пред да се појави светлината
ја насетуваш
и чувствуваш
како некоја неодолива
не-човечка топлина
се вселува во светот во којшто
сè уште
живееш и ти.
Потем светлината сама
ти ги отвора
очите.
Претчувствуваш:
светот може да се смени
само за неколку мига.
Замижи.