Препорачани албуми

#6 „Такси“ е трето дискографско издание на Френд и Фелоу („Дом“, 1997 и „Пурпурна Роза“, 1998) и веројатно нивен најдобар продукт во оваа трилогија. Овој необичен и оригинален дует го сочинуваат вокалистката Констанца Френд и гитаристот Томас Фелоу, двајцата од Германија. Заедно тие создаваат деликатно префинета музика за душа (и тело), која најдобро се конзумира во доцните вечерни часови како антипод на дневните проблеми со кои се соочуваме. Френд и Фелоу најчесто интерпретираат сопствен музички материјал, но од време на време знаат и да обработат некој познат напев и да го направат да звучи свежо и оригинално, како да е произлезен од нивната музичка работилница. Во овој случај, на дискот „Такси“ тоа се композициите „Сè уште не го најдов она што го барам“ (U2) и „Пурпурна магла“ (Џими Хендрикс). Музиката на Френд и Фелоу може да се окарактеризира како „акустичен соул“, музика која бара комплетен ангажман од слушателот и за возврат го наградува со особен филинг и богата тонална експресија. Во нивната музика може да се почувствува и силно влијание на блуз вибрации за кои мошне позитивно се изразија и луѓето како Реј Чарлс, Ел Џероу, Кеб Моу и особено Лутер Елисон кој беше нивна инспирација, пријател и ментор. Фелоу е одличен акустичен гитарист со чувство за мелодија и ненаметлива придружба кога тоа е во функција на музиката, додека Френд е експресивна вокалистка која може да се мери со најдобрите во ваков стил на музицирање. Слушнете го овој материјал и ќе ми бидете благодарни!

www.rufrecords.de