Ништо без Трифолио

/, Театар/Филм, Блесок бр. 29/Ништо без Трифолио

Ништо без Трифолио

Лица
Прв чин, сцена 1
Прв чин, сцена 2

Сцена 2.

(Доаѓа Кантарион.)

КАНТАРИОН: Не се надевав на ова од тебе!
ЛАВАНДУЛА: На кое?
КАНТАРИОН: Ова парче леб си му го дала на кучето.
ЛАВАНДУЛА: Тврдо е, од некни.
КАНТАРИОН: Не е здраво да се јаде тазе леб.
ЛАВАНДУЛА: (Настрана.) Не е здраво ни ти што си жив.
КАНТАРИОН: Што рече?
ЛАВАНДУЛА: Да си ми жив и здрав.
КАНТАРИОН: Слушај ваму. Одам во Скупи. Ме викаат итно во Сенатот. Немојте да се фрлите во трошење, зашто луѓето се завидливи, ќе почнат да ломотат: „Само што влезе во собранието, почна да лапа и да граба!“ Биди ми добра и затвори ја вратата со трите резиња!
ЛАВАНДУЛА: Со сите три? Зар не е доволно едното? Она подолгото?
КАНТАРИОН: Со трите е посигурно.
ЛАВАНДУЛА: Љубоморен си?
КАНТАРИОН: На кого љубоморен?
ЛАВАНДУЛА: Се плашиш некој да не ми цапне во твое отсуство. Јас сум најличната жена во градов!
КАНТАРИОН: Лична, лична, та прелична!
ЛАВАНДУЛА: Си мислиш дека ќе ме дочуваш ако ме заклучуваш? Да не сум чесна, би можела да направам нешто најсрамно, а да не ме сетиш!
КАНТАРИОН: Не мислам јас ти да се вардиш туку ќерките да ги вардиш. По моево напредување многу кучиња ќе се вртат околу куќава.
ЛАВАНДУЛА: Море те знам како дишеш. Ќерките се млади, природно е да се вртат околу нив. Уплав те фаќа некој да не ми чкрапне со окцето.
КАНТАРИОН: (Настрана.) Може, некој ќорав.
ЛАВАНДУЛА: Не мрмори под нос. Кажи гласно што имаш да кажеш.
КАНТАРИОН: Реков, можеби и тебе некој сака да те види. (Настрана.) Гробарот, на пример.
ЛАВАНДУЛА: И да ме види, што има лошо во тоа? Ќе има полни очи и празни раце.
КАНТАРИОН: (Настрана.) Тоа е лошото. (На Лавандула.) Туку, јас морам да тргнам. Ако дојде нашиот пријател Трифолио, речи му дека јас ја завршив својата работа, сега тој нека ја заврши неговата.
ЛАВАНДУЛА: Тебе умот ти е само во некои зделки.
КАНТАРИОН: А тебе во трошењето. Ајде, со здравје!
ЛАВАНДУЛА: Нема да ме бакнеш на одење?
КАНТАРИОН: Ќе те бакнам… кога ќе се вратам! (Заминува.)

Прочитај ја целата комедија

АвторРусомир Богдановски
2018-08-21T17:21:46+00:00 ноември 1st, 2002|Categories: Текст, Театар/Филм, Блесок бр. 29|