KU JE
me mundim i afrohem rrezinës
ku e ruaj librin me vargje për lulet
iris illyrica
për erosin lozonjar
dhe për ty që s’po vjen
kurorën e afërditës dhe brezin e saj
dhe mijëra fjalë
i mbaj lart
të jetë kjo natë gazmore
nëse vjen
ngjite përpjetë bregut
nëpër gurë dhe kandra helmuese
me shpresë se do të të gjejë në rrezinë
po më gulçon frika
nga ai lazdran
eros
që më ndjek
prej këmbëve më rrjedh gjak
nga ferrat e trëndafilave të egër
megjithatë ndalem
të ta sjell pranverën
nga bregdeti i Qipros
kurse ti nga reja
ku po rri
më shikon me indiferencë
me dylbi