PRITJE E ZEZË
derisa të kërkoj
në orën e ligë
dhe lutem që të të mos bjerë rrufeja
gjarpërinj të gjelbër presin me gojë të hapura
pas kaçubës së parë
të ngarkuar me lemeri
e dinë se të pres
me talismanin që e ruaj
për ty
prandaj rrinë në pritë
ta pengojnë bukurinë
që e ofron erosi
kurse ti ikën nga unë
me një strajcë plot kokrra të zeza oniksi
duke lënë hijen e rëndë
pas vetes
nëpër barin e shkelur
i gjej simbolet
që janë gjurmë të mundimeve të mia
duke u ngjitur të përpjetës
së golgotës
të arrij
te ti