ПЕСНИТЕ СЕ ИЗБОР ОД СТИХОЗБИРКАТА „ЕДНО И ПОЛ ПАТУВАЊЕ“, ПНВ ПУБЛИКАЦИИ, 2024
Превод од албански: Моника Митрева
СЕСТРИ
Јас сум третата сестра,
таа што се омажи далеку.
Триаголникот е најиздржливата форма во природата.
Силата подеднакво се распространува.
И потоа, се знае што велат бајките.
Без борбените принцови и без маќеите,
ни преостануваше сосем мал избор.
Ноќе нема да нè видите на небо
во лет, со планови и со клетви
(не мислете дека не можеме).
Сега трите сме седокоси.
Нашите деца пораснаа.
Ја мешаме супата до зори.
Секоја со себе донесува тоа што може:
некогаш месо, некогаш крв, некогаш сол,
а некогаш само празни раце.
Потоа се разидуваме пред да зазори.
Бајките со право предупредуваат.
Силата подеднакво се распространува.