ИСУС ИЛИ ЛЕНОН?
Немам време за мртвите,
а сè помалку и за живите.
Некоја будала ме прашува: Исус или Ленон?
Ленон, се разбира. Не им верувам на
верниците, а ни тие мене.
Мислат дека, кај и да е, ќе престанам
да верувам дека не верувам.
Се забрзува ротацијата на планетите,
а со неа и времето што лета како
Кристофер Ривс во улога на Супермен.
Она зад мене станува сè понејасно и поматно.
„Да живее сонот! Зашто сонот е неактивност.
А неактивноста е единствена природна
состојба. Секоја активност е распаѓање…“
Сергеј Довлатов е еден од малкуте писатели
што во последно време може да ме насмее.
Немам веќе време за повеќето, а богами
ни тие за мене.
Трчам кон староста како момче кон љубената.
Секој дел од животот е кратка бесконечност.
И целиот живот, сè до неговата конечност.
Одвај чекам никогаш да не умрам.