ДО СЕМОЌНИОТ
Сè уште не си ми се прикажал
(значи ли тоа дека не постоиш?).
Згрешив ли што не ѝ се приклонив
на ниту една религија?
Што сите луѓе ги третирав еднакво?
„Водачот“ е мало маче за злосторствата што
досега ги сториле твоите филијали –
независни се или со полномошно?
(Сакам да видам копија од нотар!)
Не си ништо повеќе од стрип-херој,
кој, за жал, никогаш нема да успее да
го спаси светот – ни од измислените,
ни од вистинските непријатели.
Едно ти признавам, феномен си.
Владетел со немоќта, со глупавоста,
со несигурноста, со ненајденоста…
Заблуда на првите луѓе кои, помеѓу два лова,
немале попаметна работа, па се обидувале
да размислуваат, да го спознаат она што
нам до ден-денес не ни е јасно.