(Од стихозбирката „Посвети и пофалби“, Дијалог, 2024, добитник на наградата „Ацо Шопов“ за 2024)
АПОЛОГИЈА
на Георги Старделов
Да се исцрта правописот
на исправениот од,
да се изостават дреболиите
и да се размислува во епохи,
да се воведува во иднината
со мирски увид во минатото,
да се толкуваат поетските соѕвездија
и антејски да се допира земјата,
да се живее добата на противречности
и да се држат блескави беседи за другите,
да се брани светот од некадарници,
и налик на некој ноќен градинар
да се копа по страниците на создаденото
за да се варди вистината на запишаното.
Но веќе е време да се оди, а зошто и каде –
тоа никој не го знае, никој освен Бог.