Треба да ја направиме оваа земја
Остаревме како деца на транзицијата
Без ниту еден ден работен стаж
Работи ти колку малку да закрепнеме
Треба да ја направиме оваа земја
На почеток на патот сме
Колку да купиме еден мерцедес
Да отвориме телевизија
Еден весник, фабрика или република
Ти си здрав
Не ти треба стаж и книшка
Господ да ти ги чува децата
Сѐ почнавме со волја
Со понекоја издадена книга в џеб
Во градот на транзицијата
Кој поезијата ја знаеше
Од Читанка за VIII одделение
Треба да ја направиме оваа земја
И почнаа да пишуваат
Поезија, читанки и мемоари
Со партиски книшки, книшки во џебот
Не им беше тешко
Зад нив стоеја министерства и спонзори со зорт
Мака мачеа да најдат парче леб
Да го проголтаат срамот
Дека треба да ја направиме оваа земја
И течат зборовите без точка и запирка
Ракоплескаа
Паметот, Америка
Зборуваа јазик без синтакса
Полуписмените со PhD во сивито
Остаревме како деца на транзицијата
Како такви нѐ замислуваат
Од нашите идеали
Што ни ги позајмија
Создадоа лична финансиска кауза
Треба да ја направиме оваа земја
Остаревме како деца на транзицијата
Во салони каде што се пие руски чај
Се зборува со огнен јазик
Пред националното знаме
Кое ни го нишаат како на бик во арена
А самите станаа неофеудалци, Турци, Грци и не знам што
Нè оставија да ја браниме ова земја
Како дете што има само една играчка.