Љубовта умира и други песни

Сè што ми требаше е твоето присуство
и дишење и зборување и сон, и толку
и зошто ни беше сето она стискање и бакнување,
и допири со телата и рацете,
само за да нè освести дека и ти и јас
сме биле со други многупати,
и дека ти при спиење не ги виткаш нозете
како мојата стара љубов
или јас не испуштам гласови како твојот некогашен маж
и дека освен детски,
ние инаку и не можеме да се сакаме,
зашто премногу сме поминале
иако не сме сакале