#4 Новиот албум на Gwyn Ashton со наслов “Prohibition” го претставува овој австралиски гитарист во најдобрата светлина. Тој ги меша есенцијалните звуци на Мисисипи, Њу Орлеанс и Тексас блузот со допири кон сурф манијата од шеесеттите години, британскиот рок од седумдесеттите и суровите рифови на австралискиот хард рок звук на AC/DC. Секој елемент на блузот е внесен во неговото музицирање исполнето со зачудувачка умешност и сила.
Старите „Стратокастери“, „Телекастери“, „Нешенел Резонејторс“, „Фендер“ засилувачи и сето останато се донесени до границите на издржливоста и со гаранција ќе го задоволат вкусот на секој вљубеник во звуците на гитарскиот блуз-рок. Gwyn Ashton ги користи сите можности од френетичен гитарски „слајд“ во темата “Secret Agent”, класичната тема на Rory Gallagher до пријатно и со душа исполнето свирење на темата “Rest In Paradise”, посветена на блуз великанот Stevie Ray Vaughan. Секоја од дванаесетте композиции од албумот “Prohibition” нуди жесток звук во еден бескомпромисен манир, со вкупно единаесет сопствени теми. Неговиот придружен состав исто така заслужува внимание: Chris Glen (бас), Ted McKenna (тапани) и Don Airey (клавијатури) се познати музичари од британската сцена кои настапувале или членувале со Ian Gillan, Michael Schenker Group, Tear Gas, The Sensational Alex Harvey Band, Rory Gallagher, Deep Purple, Greg Lake Band, Gary Moore, Whitesnake…! Како што е веќе вообичаено кога се работи за Gwyn Ashton, неговиот најнов албум треба да се слуша гласно, без оглед на тоа што ќе кажат комшиите!
уметноста е внатре
