РАДОСТ – Радост ослободува (2007, Слушај најгласно)
Владимир Хорват
Овој хрватски рок состав од Загреб, прв и единствен пат го гледав во Мочвара на 18 март 2007 година, на прилично збунетата Вечер на српските уметници, при што воопшто не го сфатив нивниот „домашен, сам за себе“ перформанс. Во таа прилика ми изгледаа збунето и „шугаво“, потполно неподготвени, недоречени, неоригинални и здодевни. Меѓутоа, овој албум ги оспорува моите тврдења, зашто станува збор за многу добар студиски материјал од кој може да се заклучи дека Радост се далеку подобри во студио отколку во живо. Песните им се многу радиофонични, студиски солидно продуцирани, а во поглед на компонирањето и аранжманите многу добри, па се отприлика на прагот на првите објави на Азра и избувливите Риперови (PCVC) досетки. Текстовите се идеални, како правени за поклониците на Штулиќевата песнарка, со многу продуховен и проживеан интелигентен, книшки и културолошки проџвакан бунт врз кој заспал Даниел Бифел (Полн куфер / Pun kufer). Музиката, исто така, е многу добра и е проникната со ретро влијанија од блуз, паб и хард рок, алтернатива, нов бран, реге, кабаре, поп-џез, соул, поп-рок, и одлично е аранжирана. Посебна драж Радост има во вокалот на убавкиот Брале, чиј глас е толку патетичен (како на Јурица Паѓен!) што мора да му се верува на сè што ќе изговори и отпее.
Албумот има и многу ортодоксни и оригинални композиции, како „Да зборуваме за тоа“ / “Razgovarajmo o tome (S.Beckett)”, „Се сеќаваш на мене“ / “Sjećaš me se” (инструментал кој потсетува на “Mind riot” од Soundgarden), „Црвено“, „Тритон според Самуил“ / “Triton po Samuilu (S.Beckett)”, како и неколку потенцијални хитови: „Каде исчезна времето“ / “Gdje je vrijeme nestalo (R.Davies)”, „Сите се мртви“ / “Svi su mrtvi”, „Микроскоп“, „Шапка“ / “Šešir”, „Пеперутка“ / “Leptirica” и „Сè што знам за себе“ / “Sve ono što znam o sebi” која е скришна и сосем луцидна обработка на Арсен Дедиќ.
Како гости на албумот учествуваат новите српски уметници – генијалните Тобиќ Тобиќ и Алина (гласови), и Срѓан Чинч (виолина), кои можете да ги најдете баш во каталогот Слушај погласно.
#2 Му се извинувам на бендот Радост кои не ми оставија никаков впечаток на оној концерт во Мочвара, но овој албум е одличен! Згора на тоа, албумот е одличен ретро приказ на едно време кое повеќе не постои. Ќе биде многу интересно да се види каде ќе се упати Радост со следните дела. Имаат голем потенцијал да ги пробијат комерцијалните бариери. Посилни се од Парни ваљак, Прљаво казалиште, Џибони…, а некаде се во водите околу Азра, Пипса и Балашевиќ. „Радост ослободува“ е можеби навестување на еден голем рок бенд?
Наслови: 1. Gdje je vrijeme nestalo (R.Davies), 2. Razgovarajmo o tome (S.Beckett), 3. Svi su mrtvi, 4. Gospodar prosjeka, 5. Sreća, 6. Sjećaš me se, 7. Mikroskop, 8. Crveno, 9. Šešir, 10. Hvala hvala hvala, 11. Triton po Samuilu (S.Beckett), 12. Leptirica, 13. Matematika (D.Kojić), 14. Kazaljke, 15. Sve ono što znam o sebi (J.Hendrix-A.Dedić)
Оценка (1-10): 9
Превод: И. И.
Линк: http://www.terapija.net/njuz.asp?ID=3506″