Само избегнувам да ги затворам сметките
понекогаш те посакувам
ти ги бакнувам стапалата
во безделните саботни попладниња
во недела ги водам децата на прошетка
за да можам да заборавам дека
уште на почетокот бев
изигран и напуштен
минаа толку години
а ти и понатаму се забавуваш
со далечинскиот управувач
се затворам во својата соба
и пишувам песни за луѓе
кои одвај ги познавам
само избегнувам да
ги затворам сметките
како и секогаш
валканите стакла на автомобилите
за ситни пари ќе ги измие некој друг