Духот на лименката

/, Блесок бр. 07, Театар/Филм/Духот на лименката

Духот на лименката

– трагикомична фарса –

МРТВАТА САКАНА ЧЕКА
(ОСТРОВОТ ОД ЛИМЕНКА КОКА-КОЛА. ВЛЕГУВААТ ГОЛЕМАТА И МАЛАТА СЕНКА. ДОДЕКА МАЛАТА СЕНКА БУРИЧКА И ПРЕТУРА ПО ОСТРОВОТ, ГОЛЕМАТА СЕНКА ЈА СЕДНУВА ЖЕНАТА НА ОСТРОВОТ. ГОЛЕМАТА И МАЛАТА СЕНКА СИЛНО ЈА НИШААТ ЛИМЕНКАТА. ЖЕНАТА ОД ЏЕБОТ ВАДИ ИСТРОШЕН КАРМИН. СЕ ОБИДУВА ДА ГО ИЗВАДИ СО ПРСТ. НЕ УСПЕВА. ОД ПОД СЕБЕ ВАДИ ЗГМЕЧЕНА ЛИМЕНКА КОКА-КОЛА. СЕ ОБИДУВА ДА ГО ИЗВАДИ ОТВОРАЧОТ. ТОЈ ПАЃА ВО ЛИМЕНКАТА. НЕ УСПЕВА ДА ГО ИЗВАДИ. ПОВТОРНО СЕ ОБИДУВА. ОТКОГА ЌЕ ГО ЗЕМЕ В РАКА, СО НЕГО СЕ ОБИДУВА ДА ГИ ИЗВАДИ ПОСЛЕДНИТЕ ОСТАТОЦИ ОД КАРМИНОТ. СЕ ЦРВИ. ПОВТОРНО ЈА ВРАЌА ЛИМЕНКАТА ПОД СЕБЕ. ГО СОБЛЕКУВА ЧЕВЕЛОТ. ЈА ИСТРЕСУВА ОД НЕГО ЗЕМЈАТА. ЃОНОТ НА ЧЕВЕЛОТ Е ОДЛЕПЕН И ВИСИ. СЕ ОБИДУВА ДА ГО ЗАЛЕПИ. НЕ УСПЕВА. ВКОЧАНЕТО ГЛЕДА ВО МОРЕТО БОГАТО СО ФЕКАЛИИ.)

СРЕДБА
(ОСТРОВОТ ОД ЛИМЕНКА КОКА-КОЛА. МАЖОТ НА РАЦЕ ЈА НОСИ ЖЕНАТА. ТАА Е ОМЛИТАВЕНА, БЕЗЖИВОТНА. НА ЕДНАТА НОГА ИМА ЧЕВЕЛ, А ДРУГАТА Ѝ Е БОСА. МАЖОТ СО РАЦЕТЕ СЕ ОБИДУВА ДА ЈА ИСТИСНЕ ВОДАТА ОД НЕЈЗИНИТЕ ГРАДИ. ТАА СЕ ОСВЕСТУВА И СЕ БУДИ.)

МАЖОТ
Како сте? Гледам јас и не им верувам на очите. Како само ги проголтавте сите риби од морето. Еве, тука има и крапче и сомче и кркушки. За жал, тие се мртви, а вие, како што гледам живи и здрави. Не ми е јасно, како еден мал желудник како вашиот може да собере едно олку големо море.
ЖЕНАТА
Чевелот… каде ми е чевелот?
МАЖОТ
Дајте ми ја ногата. Ќе ви биде поудобно. Имате убаво стапало како симит-погача. А прстињата, мали, дебелки, кревки како ќебапчиња. Малку сте дустабанлија. Имате и едно малку испакнато ковче на палецот. Тоа сигурно сте го наследиле од мајка ви.
ЖЕНАТА
Си го сакам мојот чевел.
МАЖОТ
Ќе ви купам нови чевли. Од крокодилска кожа, ако сакате. Убил ли некој до сега за вас крокодил?
(ПАУЗА.)
МАЖОТ
Ќе ви купам нови чевли. Со топуци од плута ако сакате. Само немојте тоа повторно да го правите.
ЖЕНАТА
Отидов јас по мојот чевел.
МАЖОТ
Остани.(ПАУЗА. МАЖОТ СЕ ПОДГОТВУВА ДА ЗАМИНЕ.) Веднаш се враќам.
(ТОЈ ИЗЛЕГУВА. ТАА ПРЕТУРА ПО ЌЕСЕТО ШТО ТОЈ ГО ОСТАВИЛ. СЕ ОБИДУВА ДА НАЈДЕ НЕШТО ЗА ДА ГО ИЗВАДИ ОСТАТОКОТ ОД КАРМИНОТ. СЕ ЦРВИ. МАЖОТ СЕ ВРАЌА. НА НЕГОВИТЕ ПАЛТО И ПАНТАЛОНИ ВИСАТ ЗЕЛЕНИ АЛГИ КОИ СЕ ЦЕДАТ. ВО РАКАТА ЈА ДРЖИ ШТИКЛАТА. КЛЕКНУВА ДА Ѝ ЈА СТАВИ. ТОЈ ГО ПРЕВРТУВА ЧЕВЕЛОТ. ОД НЕА ТЕЧЕ КАЛЛИВА ВОДА. МАЖОТ Ѝ ГО ОБЛЕКУВА ЧЕВЕЛОТ НА ЖЕНАТА.)
ЖЕНАТА
Мојот чевел.
МАЖОТ
Убави чевли. Како бело брашно тип 400. Малкуцка ѓонот виси. Од свадбата ви се?
ЖЕНАТА
Што?
МАЖОТ
За свадба ви се?
ЖЕНАТА
Зошто?
МАЖОТ
Да не чекате некого?
ЖЕНАТА
Што?
МАЖОТ
Да не чекате некого?
ЖЕНАТА
Кого?
МАЖОТ
Да не чекате некого?
ЖЕНАТА
Да, чекам.
МАЖОТ
Доцни?
ЖЕНАТА
Да, има навика да доцни.
МАЖОТ
И ти го поднесуваш тоа? Сакаш мажи со лоши навики?
ЖЕНАТА
Да, го чекам.
МАЖОТ
Колку доцни?
ЖЕНАТА
Девет години.(ПАУЗА.)
МАЖОТ
Не ти се јави дека ќе задоцни? (ПАУЗА.) Не ти остави порака на фрижидерот? (ПАУЗА.) Сигурна ли си дека ќе се врати?
ЖЕНАТА
Се надевам.
МАЖОТ
Што ако не се појави? Што ако на друг остров чека друга девојка која доцни девет минути?
ЖЕНАТА
Нека чека, жена му е.
МАЖОТ
Значи тебе ти е љубовник.
ЖЕНАТА
Пред девет години ми беше маж. Се прежени со богата вдовица од северниот леден океан. Стана тежок и мрсен фабрикант. Сега од салото на мртвите китови прави сируп против кашлица, вакцина против грип и кока кола. Денес луѓето нив ги кркаат наместо леб и млеко. Не е чудо што неговите лименки се множат наместо печурки по дожд. Тој ги надминува сите леунки, а неговите лименки светскиот наталитет.
МАЖОТ
И ти го чекаш?
ЖЕНАТА
Сакам да го видам само за миг.(ПАУЗА.)Си остарел. Косата ти оседе. Како ме пронајде? Морето е многу големо и темно. А и ништо не се гледа од мртви риби и ‘рѓосани лименки.
МАЖОТ
Белината на твоите прсти го осветлуваше морето. Исто како светулките што ги фаќавме како деца и си ги мачкавме лицата со нивната волшебна прав. Кој друг може да има толку бели прсти во толку црно море?
ЖЕНАТА
Гледај! Прстите ми се зелени како патинирани камчиња. Косата ти оседе, забите почнаа да ти се клатат. Ама не прогледна. (ПАУЗА. ОД ЏЕБОТ ВАДИ ЛИМЕНКА КОКА-КОЛА И ЈА ПОДАВА НА ЖЕНАТА.)
МАЖОТ
Жедна си?
(ЖЕНАТА ПИЕ ОД ЛИМЕНКАТА. НЕСТРПЛИВО СЕ ОБИДУВА ДА СЕ ОСЛОБОДИ ОД МРАВКИТЕ ШТО И ВЛЕГЛЕ ВО УСТАТА.)
ЖЕНАТА
Устава ми е полна со мравки. Изветреана е. Не остана ни капка кока-кола. Мравките ги собраа и последните капки по рабовите.
МАЖОТ
Да отворам нова?
ЖЕНАТА
Пред девет години отиде да купиш вино и кока-кола. На денот на нашата годишница отиде да купиш вино и кока-кола и не се врати повеќе.
МАЖОТ
Се вратив. Ајде да си одиме дома.
ЖЕНАТА
Да си одиме.
(ПАУЗА. ОСТАНУВААТ НА СВОИТЕ МЕСТА ВКОЧАНЕТИ БЕЗ ДА СЕ ПОМРДНАТ.)

2018-08-21T17:22:12+00:00 февруари 1st, 1999|Categories: Текст, Блесок бр. 07, Театар/Филм|