Низ целата нарација се провлекува една меланхолија, наречете ја песимизам ако сакате. Самиот Фериќ признава дека тоа е веројатно дел од неговата природа, но се темели и на неговото животно искуство „на набљудување на судбините на луѓето околу нас, ме учи дека животот некако секогаш нè дроби малку, на еден или друг начин. И фактот дека животот ги уништи овие мои ликови, нема никаква врска со тоа како живееле. Нивната животна несреќа не е казна, а особено не Божја казна, за тоа како живееле. Несреќите не се распределуваат во нашите животи според заслугите или вината. Несреќи има, едноставно тие доаѓаат сами по себе, по своја логика и сопствени каприци. Убеден сум дека на крајот од нашите животи нема катарза, туку некој вид на иронија. И токму тоа се обидов да го покажам во романот.“ (Ognjenović, 2019) Токму поради таа иронија, носталгија, меморија, поради галебите и темните ангели, поради несреќните судбини на љубовниците во кои се препознава секој од нас, поради сето горе споменато и многу повеќе од тоа, „На осамениот брег покрај морето“ е роман кој се чита и препрочитува, мисли и преосмислува со месеци по читањето, впрочем и самата прв пат го читав минатото лето, а неодамнешното повторно читање го инспирираше овој текст. Тоа е веројатно најголемата препорака за еден роман и инспирација да се „нафрлиме“ и на другите дела на Фериќ, „писател кому споредбите во Мишел Уелбек одамна не му се потребни како референца бидејќи со своите последни дела значајно го надмаши францускиот суперстар.“ (Pančić 2016) Книжевен суперстар или скромен наставник, сосема сеедно, Зоран Фериќ несомнено е посебен автор во полна сила кој со потполно право го сместуваат во врвот на хрватската книжевна сцена во последните две децении.
Извори:
Фериќ Зоран, На осамениот брег покрај морето, превод од хрватски јазик Владимир Јанковски, Или-Или, 2020
Ferić Zoran, Biografija, http://www.gimnazija-osamnaesta-zg.skole.hr/zoran_feri_
Glavina Ema, Književna preporuka tjedna: ”Na osami blizu mora” Zorana Ferića, 16.12.16. https://www.buro247.hr/kultura/knjige/knji-evna-preporuka-tjedna-na-osami-blizu-mora-zorana-feri-a.html Пристапено на 23.02.2021
Jurčić Josip, Razotkrivanje – Zoran Ferić, Gloria, broj 1352, 3 prosinca 2020
Ognjenović Vujica, Najučinkovitije oružje protiv nacionalizma je ismijavanje, Vijesti online, 27.04.2019, https://www.vijesti.me/kultura/383557/najucinkovitije-oruzje-protiv-nacionalizma-je-ismijavanje Пристапено на 23.02.2021
Pančić Teofil, Jagode u kljunu, Vreme, broj 1340, 8 Septembar 2016, https://www.vreme.com/cms/view.php?id=1426310 Пристапено на 21.02.2021
Pogačnik Jagna, “Na osami pored mora” Iza ležernog naslova skriva se stari, mračni Ferić, opako svoj i ekscesan, Jutarnji list, 25 studeni 2015, https://www.jutarnji.hr/kultura/knjizevnost/na-osami-blizu-mora-iza-lezernog-naslova-skriva-se-stari-mracni-feric-opako-svoj-i-ekscesan-190018 Пристапено на 19.02.2021